A xira estatal do monólogo de Touriñán segue medrando e suma novas datas
Tras o comezo da súa xira estatal en xaneiro, o monólogo de Xosé A. Touriñán continúa ampliando o seu percorrido fóra de Galicia, incorporando novas datas en Oviedo, Barcelona e Santander e reforzando a súa presenza en Madrid con dúas novas funcións.
Xosé A. Touriñán durante unha función do seu monólogo no marco da súa xira estatal. Fotografía: María Simón
O percorrido estatal do monólogo de Xosé A. Touriñán continúa collendo forza meses despois do seu inicio en Madrid. Tras as primeiras funcións no Teatro Arlequín Gran Vía e as posteriores paradas en Bilbao e Barcelona, a xira segue ampliando calendario e consolidando o seu percorrido por distintos escenarios do Estado.
A próxima cita terá lugar o vindeiro 23 de maio en Oviedo, cunha función ás 20.00 no Teatro Filarmónica que conta xa coas entradas esgotadas desde semanas antes da actuación.
Despois do período estival, o espectáculo volverá pasar por algunhas das cidades que xa forman parte deste camiño. Madrid continuará sendo un dos puntos centrais da xira coa incorporación de dúas novas funcións no Teatro Arlequín Gran Vía, previstas para o 9 de outubro e o 13 de novembro, ambas ás 22.30.
O calendario suma tamén unha nova parada en Barcelona: Touriñán regresará o 23 de outubro cunha función no Aquitània Teatre. A estas datas engádese ademais unha nova incorporación ao percorrido, Santander, onde o monólogo poderá verse o 27 de febreiro de 2027 no Teatro CASYC.
Sobre o escenario, Touriñán constrúe un espectáculo baseado na proximidade, na palabra e na experiencia compartida co público. O actor mestura realidade e ficción para revisitar momentos da súa propia biografía: decisións acertadas, erros inevitables, referencias culturais e situacións cotiás que conectan coa memoria colectiva desde o humor e a retranca.
Paralelamente, o humorista continúa compaxinando esta xira con outros proxectos escénicos como Amoriños, xunto a David Perdomo, ou a súa recente participación no EMHU 2026.
As entradas para as próximas funcións do monólogo poden adquirirse a través da web do humorista, touri.gal.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.