A regueifa chega ás Rías Baixas

O Centro Social de Abanqueiro, en Boiro, acolle este venres 6 de marzo ás 21.00 unha nova función de Territorio Regueifa, un espectáculo que mestura teatro, humor, música e improvisación para introducir ao público na arte da regueifa, nas súas orixes e na súa evolución ata a actualidade.

A proposta constrúese como unha viaxe escénica pola memoria e polo presente da improvisación oral galega. Entre momentos de retranca, música en directo e xogos co público, a función pon en valor unha práctica que durante séculos foi espazo de encontro, debate e celebración comunitaria. A regueifa aparece así non como peza de museo, senón comoterritorio vivo, capaz de estar presente na escena contemporánea sen perder a súa raíz popular.

Cada función convértese nun acontecemento único, atravesado pola enerxía do directo e pola capacidade dos intérpretes, Manolo Maseda, Lupe Blanco e Josinho da Teixeira, para ler o que acontece na sala. A palabra improvisada funciona como motor da experiencia, borrando as fronteiras entre escenario e patio de butacas e convertendo o espectáculo nun exercicio compartido de humor, identidade e complicidade.

Tras unha estrea moi significativa en Carballo, lugar especialmente vencellado á tradición regueifeira, Territorio Regueifa continúa así a súa xira levando a improvisación oral a novos escenarios e públicos, reivindicando a súa vixencia e a súa capacidade para dialogar coa actualidade desde o humor, a identidade e a creación colectiva.

As entradas poderán adquirirse o mesmo día da función na taquilla do Centro Social de Abanqueiro, a partir das 20.00.