‘A Rabia’ entra no catálogo New Spanish Shorts do ICAA
A curta dirixida por Alberto Díaz conta con Xosé A. Touriñán entre os seus protagonistas. O 6 de febreiro proxectarase dentro mercado do festival internacional de Clermont-Ferrand, un dos máis importantes de Europa.

A Rabia, dirixida por Alberto Díaz e con Xosé A. Touriñán entre os seus protagonistas, foi incluída no catálogo New Spanish Shorts de 2022 editado polo ICAA para promocionar as mellores curtametraxes do ano. A curtametraxe filmouse o pasado verán no Courel e conta tamén no seu reparto con Antonio Durán “Morris” e María Vázquez.
A historia achéganos ao universo de Filomena, a bisavoa do director, nunha aldea luguesa do século XIX e os “terribles acontecementos” que lle tocou vivir. Unha historia que chegou a oídos de Alberto Díaz en conversas familiares e que decidiu levar á pantalla. Para recrear a atmosfera, o cineasta recorreu ás fotografías que Ruth Matilda Anderson fixo a algunhas das localizacións do filme hai máis de 100 anos.
O 1 de febreiro a curta proxectarase no mercado profesional do Festival Internacional de Clermont-Ferrand xunto con outras 6 seleccionadas polo ICAA. Este mercado ten como finalidade mostrar os mellores traballos do ano a distribuidores e programadores de todo o mundo. España é o país convidado deste ano no festival francés, unha referencia internacional na exhibición de curtametraxes.
Gran acollida do regreso de Touriñán á TVG
Esta semana emitiuse o primeiro episodio de Catro Gatos na Televisión de Galicia, o novo programa de humor da cadea, con moi bos datos de audiencia. Máis de 103.000 persoas viron en directo o primeiro capítulo o domingo á tarde, sendo o programa máis visto na súa franxa en Galicia.
Touriñán, Fátima Pego, David Perdomo e Noemi Rodríguez volven este domingo con máis conversa e sketchs, nesta ocasión, centrada nos deportes. Podedes seguir todas as novidades de Catro Gatos no seu Facebook e Instagram, onde os protagonistas tamén quedaron para comentar na previa o primeiro episodio.

NOTICIAS RELACIONADAS
‘Territorio Regueifa’ continúa o percorrido fóra de Galicia con dúas funcións en Asturias
O espectáculo chegará a Xixón e Vegadeo os días 27 e 28 de novembro, respectivamente, nunha nova parada da xira que está levando a improvisación oral galega a outros territorios.
Unha nova etapa para ‘Territorio Regueifa’
O espectáculo de Lupe Blanco, Manolo Maseda e Josinho da Teixeira ofrecerá tres funcións durante esta fin de semana en Barakaldo e Laudio. Será a primeira vez que a proposta saia de Galicia desde a súa estrea en febreiro.
Zaragoza, a próxima parada do humor de Touriñán
O humorista actuará este sábado no Teatro de las Esquinas, nun percorrido que o levará de novo a Madrid en novembro. A xira continuará en 2027 con novas funcións en Madrid, Valencia, Santander e León.


