‘Territorio Regueifa’ chega hoxe ao Val do Ubra cunha función de balde
A función será de acceso libre ata completar o aforo, unha oportunidade para achegarse á regueifa e á improvisación oral galega a través do teatro, a música e o humor. A proposta combina divulgación e creación en directo para mostrar como esta tradición continúa viva e dialoga co presente.
Lupe Blanco, Manolo Maseda e Josinho da Teixeira durante unha función de 'Territorio Regueifa'. Fotografía: Aigi Boga
O Auditorio Municipal do Val do Ubra acolle hoxe, 9 de outubro, ás 20.30 h, unha nova función de Territorio Regueifa. A entrada será de balde ata completar o aforo, co obxectivo de facilitar o acceso do público a unha proposta escénica que reivindica a palabra improvisada como parte do patrimonio cultural galego.
Dirixido por José L. Prieto e protagonizado por Lupe Blanco, Manolo Maseda e Josinho da Teixeira, o espectáculo mestura teatro, música, humor e improvisación para percorrer a historia da regueifa, desde as súas orixes ata a súa presenza na actualidade. A través de diferentes escenas e situacións inesperadas, a proposta explora as posibilidades desta tradición oral e a súa capacidade para contar o mundo desde a retranca e a creatividade.
Cada representación constrúe unha experiencia propia, na que a palabra se crea en directo e o público forma parte do xogo escénico. Territorio Regueifa incorpora tamén reflexións sobre a evolución desta práctica e o papel das mulleres na improvisación rimada, amosando que a regueifa non é só unha tradición que se conserva, senón unha expresión cultural que segue medrando e transformándose.
A función de hoxe forma parte dunha xira que continuará durante o outono con dúas novas citas. O 6 de novembro, o espectáculo chegará ao Centro Galego de Bizkaia, en Barakaldo, na súa primeira representación fóra de Galicia. Máis adiante, o 19 de novembro, regresará aos escenarios galegos cunha función na Casa da Cultura de Bertamiráns, en Ames. As entradas para estas dúas citas estarán dispoñibles proximamente.
Desde a súa estrea absoluta en Carballo, Territorio Regueifa continúa achegando a improvisación oral a públicos e espazos diversos, combinando a forza dunha tradición popular cunha linguaxe escénica contemporánea.
NOTICIAS RELACIONADAS
‘A Lacena Pequena’ chega a Triacastela cunha programación arredor do patrimonio e a natureza
A programación inclúe unha exposición de Ana Carballo, unha conferencia do antropólogo Rafael Quintía, unha degustación de produtos locais e actuacións de danza e música tradicional.
A Lacena Pequena chega á Rúa cunha xornada arredor da memoria, as festas e o viño
A programación do 3 de outubro percorrerá a historia das celebracións da localidade, a tradición vitivinícola de Valdeorras e a música popular. A xornada contará con conversas, poesía, unha cata de viños e cantos de taberna.
Lamatumbá, Premio Rebulir da Cultura Galega na categoría de Música Galega
O grupo ourensán suma un novo recoñecemento á súa traxectoria, marcada pola mestura de estilos, a lingua galega e unha maneira propia de entender a música popular.