‘A Lacena Pequena’ chega a Triacastela cunha programación arredor do patrimonio e a natureza
A Praza do Concello acollerá as actividades a partir das 16.00 h, nunha xornada que convida a descubrir os saberes e as expresións culturais vinculadas ao Camiño de Santiago. Todas as propostas serán gratuítas e estarán abertas ao público.
'A Lacena Pequena' en Vedra. Fotografía: Laura Pose
A Lacena Pequena continúa o seu percorrido por diferentes localidades galegas e mañá, sábado 10 de outubro, instalarase na Praza do Concello de Triacastela. Esta terceira parada marca o ecuador da primeira ruta, que leva un contedor marítimo transformado nun espazo cultural móbil a pequenos núcleos de poboación. A programación adáptase a cada territorio e, nesta ocasión, combina creación artística, divulgación, gastronomía e música tradicional. A actividade comezará ás 16.00 h coa apertura da Lacena.
Ás 18.00 h terá lugar a presentación da exposición Polo camiño, de Ana Carballo, unha proposta que abrirá a programación da tarde arredor da creación e da relación coa contorna. Unha hora despois, ás 19.00 h, o antropólogo Rafael Quintía impartirá a conferencia Saberes que coidan o camiño. Paisaxe, tradición e natureza no Camiño de Santiago. A intervención abordará os coñecementos e as prácticas culturais vinculados ao territorio, así como a relación entre a paisaxe, a natureza e as tradicións que forman parte da experiencia do Camiño.
A programación continuará ás 20.15 h cunha degustación de produtos locais, na que se poderán probar embutidos, queixos e mel de La Abuela Delfina, Casa López e Mel de Lagares. Despois, a música e o baile porán o broche á xornada. Ás 20.30 h actuará o grupo de danza Magie Dance, seguido, ás 21.00 h, dos Gaiteiros de Albela, que pecharán a programación cunha actuación de música tradicional.
Todas as actividades serán de balde, dentro da vontade do proxecto de facilitar o acceso á cultura e xerar espazos de encontro arredor das iniciativas e expresións propias de cada lugar.
A programación de Triacastela continúa a dinámica de A Lacena Pequena, un proxecto promovido por Ainé e E-ló? D Arquitectura e impulsado pola Xunta de Galicia ao abeiro do programa ‘O Teu Xacobeo’.
Despois de pasar por Vedra e A Rúa, Triacastela é a terceira das cinco localidades incluídas nesta primeira ruta. O percorrido continuará en Portas os días 23 e 24 de outubro e rematará en Boqueixón os días 30 e 31 de outubro. Toda a información sobre o proxecto e as próximas paradas estará dispoñible en alacenapequena.gal.
NOTICIAS RELACIONADAS
‘Territorio Regueifa’ chega hoxe ao Val do Ubra cunha función de balde
O Auditorio Municipal acolle ás 20.30 h unha nova representación do espectáculo, protagonizado por Lupe Blanco, Manolo Maseda e Josinho da Teixeira. A xira continuará en novembro con dúas citas en Barakaldo e Ames.
A Lacena Pequena chega á Rúa cunha xornada arredor da memoria, as festas e o viño
A programación do 3 de outubro percorrerá a historia das celebracións da localidade, a tradición vitivinícola de Valdeorras e a música popular. A xornada contará con conversas, poesía, unha cata de viños e cantos de taberna.
Lamatumbá, Premio Rebulir da Cultura Galega na categoría de Música Galega
O grupo ourensán suma un novo recoñecemento á súa traxectoria, marcada pola mestura de estilos, a lingua galega e unha maneira propia de entender a música popular.