Xosé A. Touriñán recibe o Premio Oliva 2026 no Festival Internacional de Series Ría de Vigo
A entrega tivo lugar o pasado venres en Vigo, durante a gala de clausura do festival. Ao longo de tres xornadas, o certame reuniu profesionais da industria audiovisual, estreas exclusivas, coloquios e actividades centradas no universo das series, consolidando a súa presenza no calendario do sector.
Xosé A. Touriñán na gala de clausura xunto a Ana Ortiz, Lucía Sánchez e representantes do festival. Fotografía: Pablo Hernández Gamarra
O actor e humorista Xosé A. Touriñán recibiu o pasado 12 de xuño o Premio Oliva 2026 no marco da gala de clausura da segunda edición do Festival Internacional de Series Ría de Vigo, celebrada no Tinglado do Porto de Vigo.
O recoñecemento foi un dos momentos máis destacados da noite e serviu para poñer en valor unha traxectoria profesional que converteu a Touriñán nun dos rostros máis coñecidos do audiovisual galego e estatal. Ao longo dos últimos anos participou en numerosas producións para cine e televisión, combinando a súa faceta como actor coa creación e produción de proxectos propios.
A segunda edición do festival desenvolveuse entre os días 10 e 12 de xuño e reuniu en Vigo profesionais da industria audiovisual, representantes institucionais e público interesado no mundo das series. Durante tres xornadas celebráronse coloquios, presentacións, encontros profesionais e estreas exclusivas de novas producións.
A gala de clausura serviu tamén para recoñecer diferentes proxectos audiovisuais e para presentar novos contidos que chegarán proximamente ás pantallas. Entre eles estivo o preestreo de Millonarios, a nova serie da TVG protagonizada polo mesmo Touriñán xunto a Eva Iglesias.
Co Premio Oliva 2026, o Festival Internacional de Series Ría de Vigo recoñece a achega de Xosé A. Touriñán ao sector audiovisual e unha carreira construída ao longo de máis de dúas décadas entre a interpretación, a comedia, a produción e a creación de contidos.
NOTICIAS RELACIONADAS
Xosé A. Touriñán presenta ‘Moi Animal’, o seu novo monólogo
O humorista estrea unha nova proposta escénica arredor da nosa relación cos animais e das contradicións da especie humana. A xira comezará en outubro e percorrerá once localidades galegas.
Moi Animal
‘Moi Animal’ é o novo monólogo de Xosé A. Touriñán. A partires de outubro, percorrerá Galicia reflexionando sobre a nosa peculiar relación co resto das especies.
A Coruña acolle a programación do Noroestiño, a proposta familiar do 39º Festival Noroeste Estrella Galicia
A programación infantil do Festival Noroeste Estrella Galicia volverá aos Xardíns de Méndez Núñez do 5 ao 9 de agosto con sete propostas de música e artes escénicas para público familiar.