Touriñán, na nova temporada de Land Rober

O humorista e actor cullerdense é, unha temporada máis, unha das estrelas do programa presentado por Roberto Vilar na Televisión de Galicia. Na súa volta ás pantallas o pasado mes de xaneiro, Touriñán fixo popular o personaxe de Joao Simoes, o portugués ao que lle tocou unha importante suma de millóns nun sorteo.

Un dos programas estrela da Televisión de Galicia está de novo nas grella  da canle autonómica. O Land Rober de Roberto Vilar regresou o pasado mes de setembro logo das vacacións de verán co seu habitual equipo de colaboradores entre os que, unha temporada máis, destaca o polifacético Xosé A. Touriñán.

O actor cullerdense é unha das caras visibles dun exitoso formato que compaxina actuacións musicais, entrevistas e sketches nun particular tono cómico que cada semana reune a milleiros de persoas diante das pantallas. Os camaleónicos papeis de Touriñán, entre os que destacou a pasada primavera o do multimillonario portugués Joao Simoes, son aclamados polo público que mesmo agarda semanas para poder vivir este espectáculo televisivo en directo desde o plató.

Touriñán compaxina durante este outono as súas aparicións semanais en Land Rober cun proxecto teatral no que participará xunto con David Amor e Ledicia Sola, ademais das gravacións dun novo programa que prepara xunto co seu eterno compañeiro Marcos Pereiro.