Un dos programas máis seguidos da canle pública volve este mércores ás pantallas logo da parada polas vacacións do verán. Xosé A. Touriñán encabezará de novo o amplo equipo de colaboradores deste divertido espectáculo televisivo centrado no humor.
Volve, logo do verán, un dos programas máis queridos polos espectadores da Televisión de Galicia. Volve o humor en directo nun completo espectáculo televisivo que cada mércores é quen de reunir a milleiros de espectadores detrás da pequena pantalla. O Land Rober está de volta, e con el Xosé A. Touriñán, o seu colaborador máis aclamado.
O actor cullerdense é unha das caras visibles deste exitoso formato que compaxina actuacións musicais, entrevistas e sketches nun particular ton cómico que cada semana reune á audiencia da TVG diante das pantallas. Os camaleónicos papeis de Touriñán, entre os que destacou nas últimas temporadas o do multimillonario portugués Joao Simoes, son aclamados polo público que mesmo agarda semanas para poder vivir este espectáculo televisivo en directo desde o plató.
Touriñán compaxinará durante este outono o seu traballo en televisión coas representacións de dous espectáculos en vivo: o Monólogo do Imbécil (un texto teatral de José Prieto co que comezou a xirar a pasada primavera), e Curtis & Teixeiro, xunto con Federico Pérez, que logo de encher ata en doce localidades o pasado mes de xaneiro retoma a partir de mediados de outubro as súas funcións nas principais cidades do país.
