Vilalba e Noia súmanse á xira de Fariña
O espectáculo dirixido por Tito Asorey, que desde o pasado mes de outubro xira por toda Galicia, estará a próxima fin de semana no Auditorio Carmen Estévez e no Teatro Coliseo Noela, o venres 24 e o sábado 25, respectivamente.
O calendario de Fariña conta con dúas novas citas para este mes de xaneiro: Vilalba e Noia. Promovidas polas áreas de cultura dos Concellos lugués e coruñés, súmanse ás funcións que desde outubro representa por toda Galicia o equipo encargado de levar ás táboas a adaptación de José L. Prieto da obra de Nacho Carretero, con Xosé A. Touriñán, Marcos Pereiro, María Vázquez, Sergio Zearreta e Cris Iglesias no elenco.
Con sensacionais datos de espectadores e crítica, o espectáculo rematará a súa primeira xira o 1 de febreiro en Cangas, función para a que quedan aínda localidades á venda.
Fariña chegará a Vilalba o venres 24 de xaneiro, cunha función prevista para as 20.30 horas no Auditorio Carmen Estévez. As entradas, cun prezo de 18 €, poden mercarse a través de Ataquilla.com.
No caso da función de Noia a función terá lugra no Teatro Coliseo Noela, o sábado 25 de xaneiro ás 20.30 horas, coas entradas esgotadas desde poucas horas despois de que o Concello as sacara á venda.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.