Touriñán celebra o día dos namorados cunha función do seu monólogo en Madrid
No día de San Valentín, Xosé A. Touriñán aposta polo encontro coa palabra, o humor e a experiencia. O humorista galego sobe este sábado ás táboas do Teatro Arlequín de Madrid cunha nova función do seu monólogo. A cita forma parte dun percorrido estatal que o levará a espallar o seu humor por distintas cidades fóra de Galicia.
Póster do Monólogo de Xosé A. Touriñán. Realizado por Carolina Rodríguez.
Con iso que adoita dicirse de que sempre hai alguén da casa en todas partes, Xosé A. Touriñán decidiu levar o seu monólogo máis alá das nosas fronteiras e iniciar o pasado xaneiro unha xira, que o está a situar en escenarios de referencia da comedia estatal. Madrid foi o punto de partida deste percorrido e convértese tamén nun dos seus eixos centrais, con varias datas programadas no Teatro Arlequín Gran Vía ao longo do inverno e da primavera.
O espectáculo baséase na proximidade e na palabra. Sobre o escenario, Touriñán constrúe un relato no que mestura realidade e ficción para facer un repaso pola súa propia biografía: decisións acertadas, erros inevitables, feitos casuais e referencias culturais que dialogan cun público que se recoñece no contado. O humor xorde do diálogo, da experiencia conxunta e da capacidade de rir dun mesmo, convertendo cada función nun encontro directo coa xente.
Tras esta nova parada en Madrid, a xira continuará en Bilbao (7 de marzo), volverá ao Arlequín o 20 de marzo e o 11 de abril, pasará por Barcelona (27 de marzo) e chegará a Oviedo o 23 de maio. Un percorrido que chega nun ano no que Touriñán continúa ampliando o seu radio de acción sen perder o vínculo coa escena e co público.
Para máis información sobre o monólogo e a xira pódese consultar a web oficial do actor, touri.gal, onde tamén está dispoñible a venda de entradas.
NOTICIAS RELACIONADAS
‘A Lacena Pequena’ chega a Triacastela cunha programación arredor do patrimonio e a natureza
A programación inclúe unha exposición de Ana Carballo, unha conferencia do antropólogo Rafael Quintía, unha degustación de produtos locais e actuacións de danza e música tradicional.
‘Territorio Regueifa’ chega hoxe ao Val do Ubra cunha función de balde
O Auditorio Municipal acolle ás 20.30 h unha nova representación do espectáculo, protagonizado por Lupe Blanco, Manolo Maseda e Josinho da Teixeira. A xira continuará en novembro con dúas citas en Barakaldo e Ames.
A Lacena Pequena chega á Rúa cunha xornada arredor da memoria, as festas e o viño
A programación do 3 de outubro percorrerá a historia das celebracións da localidade, a tradición vitivinícola de Valdeorras e a música popular. A xornada contará con conversas, poesía, unha cata de viños e cantos de taberna.