‘Táboas’ viaxa a Portugal para coñecer de primeira man o Festival de Almada

A revista de Ainé foi convidada pola organización da 39ª edición do Festival de Almada, que se celebra do 4 ao 18 de xullo nesta cidade do distrito de Setúbal, na rexión de Lisboa.

O Festival de Almada, que celebra este ano a súa 39ª edición, é un dos máis importantes e singulares de Portugal. A revista Táboas estivo esta primeira semana convidada pola organización para coñecer de preto o labor que a Companhía de Teatro de Almada, organizadora do festival, leva ao cabo.

O Teatro Municipal Joaquim Benite, sede da Companhía e unha das sedes do festival é un singular edificio azul, cunha dotación excepcional para o teatro. Puidemos comprobar de primeira man o equipamento e disposición das dúas salas e do resto das instalacións compostas por salas de exposicións, área administrativa, salas de ensaio e espazos escénicos secundarios no restaurante.

Mais a sede “real” do festival é a explanada da Escola D. António da costa Costa, punto de encontro de público, veciños, compañías, xornalistas e críticos. Alí todos os seráns teñen lugar os xantares con concertos mentres non se pon o sol e pode comezar o espectáculo do Palco Grande; un gran escenario ao aire libre instalado ao carón do Teatro Joaquim Benite. Ademais, na propia escola instálanse diversas exposicións, destacando este ano a adicada ao escenógrafo José Manuel Castanheira.

Almada realmente é a festa do Teatro (así se denominou nas primeiras edicións dos anos 80). É un lugar para desfrutar do teatro en sentido amplo, para o intercambio de ideas e unha oportunidade de ver espectáculos dificilmente accesibles doutra forma para o público portugués e galego.

Nestes días puidemos ver monólogos experimentais, teatro do absurdo, teatro do movemento… e mesmo un Shakespeare. Propostas moi diversas integradas de xeito natural nun programa intenso de dúas semanas con máis de dúas obras diarias de compañias portuguesas e internacionais. O Festival de Almada é un exemplo de como achegar o teatro aos veciños e atraer públicos diversos, fidelizando durante case 40 anos a varias xeracións de almadenses.

Novo número da revista Táboas

Este verán publicaremos o segundo número da revista Táboas, cunha versión física e outra dixital que estará en acceso libre na nosa web. Nas próximas semanas iremos desvelando algúns dos seus contidos. O primeiro número está dispoñible para a súa lectura nesta ligazón.