O espectáculo de Carlos Blanco e Xosé A. Touriñán, co que xa gozaron ao redor de 40.000 espectadores este ano, ten programadas funcións en Pontevedra, Ferrol, Lugo, Santiago, Cangas, Vigo, A Coruña, Ourense e Narón ata mediados do mes de xaneiro.
A segunda xira de ‘Somos Criminais’ segue o seu curso. Carlos Blanco e Xosé A. Touriñán comezan o percorrido polas grandes cidades logo de encher os teatros e auditorios de Vilagarcía, Noia, Negreira e As Pontes nas últimas semanas, nalgúns casos ata en dobres funcións.
A venda de entradas nos espazos dos grandes núcleos de poboación do país avanza a bo ritmo, e en localidades como en Pontevedra están previstas tres funcións (en novembro, o sábado 2 -18.00 e 20.30- e domingo 3 -18.00-). En Vigo comezou hai poucos días a venda da terceira función para a fin de semana do 7 e o 8 de decembro, e en Compostela serán tamén tres as representacións. Ferrol, Lugo e Cangas completan o programa no que queda de ano, e xa no mes de xaneiro a xira rematará na Coruña, Ourense e Narón, funcións para as que as entradas non están polo momento á venda.
En ‘Somos Criminais’ os actores e cómicos Carlos Blanco e Xosé A. Touriñán analizan unha suposta cultura criminal propia en Galicia, que se manifesta nun xeito diferente de delinquir. En oitenta minutos de espectáculo analizan e dramatizan crimes autóctonos en todas as súas variables, desde o crime por arroutada ata o crime por acumulación de mala hostia, pasando polo crime familiar por causa das herdanzas, o asasinato por suxestión ou as orixes do narcotraficante galego.
