Sabe ben Marcos Pereiro que non hai dor. Que todo é cuestión de constancia e disciplina. Que o seu corpo non o ten calquera, e por algo será! En Redondela e Carballo coñecerán esta fin de semana os segredos para ser como Armario Empotrado.
O primeiro monólogo de Marcos Pereiro é toda unha guía práctica para aquel que desexa cumprir os seus obxectivos no ximnasio. E é que o actor cullerdense ten experiencia, e moita! É certo tamén que o seu son os ximnasios caros, con monitores de nomes impronunciables e mostradores de mármol. Pero o resto non deixan de ser relacións, nos vestiarios, na sala de fitness…
Logo de presentar os seus consellos na Illa de Arousa, A Coruña, Noia, Cedeira e Santiago de Compostela, Marcos chega esta fin de semana a Redondela (Multiusos da Xunqueira, con entradas á venda en Ataquilla) e Carballo (American). No que queda de mes visitará Cuntis e A Peroxa, os días 28 e 29 de abril respectivamente.
