‘Parasimpáticas’: improvisación, humor e dúas neuronas en acción
O vindeiro sábado 21 de febreiro ás 20.00, o Auditorio Municipal do Concello de Vigo acollerá unha nova función do espectáculo de improvisación protagonizado por Lucía Veiga e Marita Martínez.
Lucía Veiga e Marita Martínez. Fotografía: Aigi Boga.
Parasimpáticas parte dunha premisa tan absurda como reveladora: dúas neuronas convocan unha ‘Xunta Extraordinaria’ para analizar o estado da materia gris galaica. A partir desta idea, Lucía Veiga e Marita Martínez constrúen un dispositivo escénico baseado na improvisación, no humor e na complicidade co público.
Cada punto da ‘orde do día’ convértese nunha viaxe polos lugares comúns do imaxinario colectivo galego, a través dun xogo continuo no que a escena se constrúe no presente, e onde o inesperado forma parte da propia dramaturxia. A peza sitúase así nun territorio híbrido entre o teatro de improvisación, a comedia e a observación social. Porque ser galego, é un estado mental.
O espectáculo supón un novo encontro escénico entre dúas intérpretes cunha ampla traxectoria no humor e na improvisación. Lucía Veiga, actriz e humorista con ampla experiencia en teatro, televisión e audiovisual, combina neste proxecto a súa capacidade interpretativa cunha presenza escénica marcada pola ironía e a conexión directa co público. Pola súa banda, Marita Martínez, actriz e improvisadora cun longo percorrido nas artes escénicas, achega ao espectáculo unha forte experiencia no traballo coa palabra espontánea, a narración oral e o humor en vivo, elementos centrais na dinámica de Parasimpáticas.
A función deste sábado en Vigo chega con todas as entradas esgotadas, consolidando a boa acollida dun espectáculo que aposta pola improvisación como ferramenta de creación escénica e pola comedia como espazo de encontro.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.