O monólogo de Touriñán continúa a súa xira estatal e suma novas funcións
A xira estatal do monólogo de Xosé A. Touriñán continúa avanzando con forza tras o seu inicio en Madrid a comezos de ano. O humorista segue levando o seu espectáculo a distintos escenarios fóra de Galicia, cun calendario que vai sumando novas datas para despois do verán.
Xosé A. Touriñán durante unha función do seu monólogo en Madrid. Fotografía: María Simón
Despois das primeiras funcións celebradas en Madrid e da recente parada en Bilbao, a xira estatal do monólogo de Xosé A. Touriñán continúa o seu percorrido cunha nova función esta mesma semana. O actor regresará ao Teatro Arlequín Gran Vía de Madrid este 20 de marzo, consolidando a cidade como un dos puntos centrais desta xira.
O calendario continuará nas próximas semanas con novas paradas en diferentes cidades do Estado. Entre elas destaca a función prevista en Barcelona o 27 de marzo, que xa esgotou todas as entradas dispoñibles, antes do regreso do espectáculo a Madrid o 11 de abril e da posterior actuación en Oviedo o 23 de maio.
Ademais destas citas xa confirmadas para a primavera, o percorrido do monólogo seguirá ampliándose nos próximos meses. A xira incorporará novas funcións no outono con paradas previstas en Madrid o 3 de outubro, Barcelona o 23 de outubro e Zaragoza o 31 de outubro, datas que sairán á venda proximamente.
O monólogo constrúese arredor da palabra, a experiencia e a proximidade co público. Sobre o escenario, Touriñán mestura realidade e ficción para facer un repaso pola súa propia biografía, revisitando decisións acertadas, erros inevitables e momentos que marcaron o seu camiño persoal e profesional. A través desta mirada, o espectáculo combina humor, memoria e referencias culturais que conectan facilmente coa experiencia compartida do público.
As entradas para as funcións actualmente dispoñibles poden adquirirse a través da web touri.gal, onde tamén se irá actualizando a información sobre as novas datas da xira.
NOTICIAS RELACIONADAS
‘Amoriños’ chega ao Noroeste Estrella Galicia cunha edición especial en Santa Margarida
O espectáculo de Xosé A. Touriñán e David Perdomo formará parte da programación da 39 edición do Festival Noroeste Estrella Galicia cunha función especial o 9 de agosto.
Xosé A. Touriñán incorpórase ao elenco da terceira e última tempada de ‘Clanes’
A serie de Netflix producida por Vaca Films despídese cunha última entrega que volve reunir a Clara Lago e Tamar Novas como protagonistas, xunto a un amplo elenco do que forma parte Xosé A. Touriñán. A tempada final pecha a historia deste universo do narcotráfico en Cambados.
Máis improvisación oral para despois do verán: ‘Territorio Regueifa’ suma tres novas funcións
O espectáculo regresará aos escenarios en outubro e novembro con tres novas funcións xa confirmadas. Entre elas destaca a primeira representación fóra de Galicia, que terá lugar en Barakaldo.