O emotivo final da xira de ‘Agora en serio’

Touriñán e Marcos Pereiro remataron a derradeira función da xira, no auditorio coruñés do Ágora, rodeados por primeira vez de todas as irmás de Mucha e Nucha. De todas… menos de Carmucha.

Todas as irmás de Mucha e Nucha subiron ao escenario do Ágora. | Foto: Carla García

O auditorio do Ágora, na Coruña, acolleu o pasado sábado as derradeiras funcións de Agora en serio, o espectáculo co que Marcos Pereiro e Xosé A. Touriñán celebran desde principios de maio o seu quince aniversario como dúo cómico. Un texto teatral dirixido por Evaristo Calvo e Manolo Cortés co que foron quen de encher teatros e auditorios en Noia, Lugo, Cangas, Pontevedra, O Carballiño, Santiago, Vigo e Vilagarcía de Arousa.

O éxito de público do espectáculo provocou que para a función da Coruña tiveran que ser dúas as funcións programadas, ás 19.00 e ás 21.00, aínda que esta última non foi igual que todas as anteriores…

Sen que Mucha e Nucha souberan nada, unha a unha foron saíndo ao escenario as súas irmás: Pepucha (Pepo Suevos), Lucha (Federico Pérez), Gelucha (Jaime Reimúndez, amigo da infancia de Touriñán e Marcos Pereiro, que acompañou aos actores en boa parte das súas actuacións nos seus inicios), Chucha e Milucha (Javi Lopa e Álvaro Pérez Becerra, de Ainé Producións), Pacucha e Pestrucha (parellas de Pereiro e Touriñán), Manucha (Manolo Pereiro, pai de Marcos), e Pilucha (o avó de Touriñán). Quedaba unha sorpresa, e é que tamén saiu Pablucha (Manuel Pablo, o xogador do Deportivo), que avisou aos asistentes de que, unha vez máis, Carmucha non podía estar.

E ‘As Fillas da Conexa’ volveu soar…

Para poñer o punto e final á sorpresa quedaba unha cousa máis: cando Mucha e Nucha propuxeron rematar a función cantando unha canción moderna, Pepucha (Pepo Suevos) interrumpiu dando paso a un acordeonista que se achegou ao escenario interpretando a melodía dunha canción coñecida por todas as irmás. Era ‘As Fillas da Conexa’, que remataron cantando todas, e tamén o público, para despedir unha xira para o recordo.

Artigo anterior
Evaristo Calvo estréase co Barrantes en Compostela
Artigo seguinte
Touriñán estrearase na ficción nacional en ‘Fariña’, a gran aposta de Antena 3 para a próxima temporada

NOTICIAS RELACIONADAS

Portada » Caderno » O emotivo final da xira de ‘Agora en serio’