Lamatumbá gaña o Premio Martín Códax da Música na categoría de Orquestras, Grupos e Música de Verbena

A banda ourensá Lamatumbá vén de recibir o Premio Martín Códax da Música na categoría de Orquestras, Grupos e Música de Verbena, nunha gala celebrada o pasado 27 de maio no Pazo da Cultura de Pontevedra e organizada pola asociación Músicas ao Vivo.

Este recoñecemento impulsa e reforza o momento que atravesa actualmente o grupo, inmerso na xira de LAMATUMBÁ… E XA ESTÁ!, unha proposta coa que continúa levando aos escenarios a súa particular maneira de entender a festa, a música popular e o directo.

Formada en Ourense a finais dos anos noventa, Lamatumbá converteuse ao longo dos anos nun dos nomes máis recoñecibles da música galega grazas a unha proposta que mestura ska, reggae, rock, cumbia, funk e folk desde unha identidade propia marcada pola retranca, a celebración e a conexión co público.

Ao longo da súa traxectoria, a banda construíu un repertorio que forma xa parte do imaxinario colectivo galego, con temas como Licorcafé ou traballos como Lume (para que saia o sol), contribuíndo a renovar os códigos da verbena e das festas populares.

Durante a recollida do premio, os integrantes do grupo agradeceron o recoñecemento e quixeron lembrar ás preto de corenta persoas que formaron parte do proxecto ao longo destas décadas. Foi un momento de alegría, orgullo e honra.

O galardón sitúa a Lamatumbá entre os proxectos distinguidos nesta XIII edición dos Premios Martín Códax da Música, uns premios que continúan consolidándose como unha das principais plataformas de recoñecemento para a música feita en Galicia e para a diversidade de propostas que conforman o sector musical do país.

A banda continuará nos próximos meses o percorrido de LAMATUMBÁ… E XA ESTÁ! con novas citas en festivais como Rockandorna, en Ribeira, ou Terra Brava, no Incio, mantendo vivo un proxecto que segue a formar parte da memoria festiva de varias xeracións de galegas e galegos.