Estreamos ‘Virxinia’, unha ferramenta tecnolóxica para promover a economía circular nos nosos proxectos

Co comezo do curso continuamos introducindo melloras non só no que pasa enriba dos escenarios, senón tamén nos procesos que permiten que todo vaia ben cando comeza cada espectáculo.

Unha das grandes asignaturas pendentes de todo o sector da cultura en Galicia son os criterios de sostibilidade nos procesos de creación, e agora damos un paso importante co que promover a economía circular desde a nosa actividade empresarial. Facémolo grazas a ‘Virxinia’, un proxecto tecnolóxico no que levamos meses traballando da man da tecnolóxica Altia e doutras empresas e profesionais, e que financiamos grazas ás axudas á implantación de solucións avanzadas para o desenvolvemento da economía circular, cofinanciadas pola Unión Europea.

O obxectivo principal destas axudas é o reforzo do crecemento sostible e a competitividade das pemes, e a creación de emprego nestas, tamén mediante investimentos produtivos. O resultado que pretenden acadar é posta en marcha de proxectos de dixitalización cuxa finalidade sexa a implantación de solucións para o soporte dixital de procesos.

No noso caso, trátase dunha ferramenta de inventario que xira ao redor de dous grandes obxectivos: o control do ciclo de vida de cada recurso que adquirimos, para aproveitalo o máximo posible antes de desafacernos del, e o coñecemento sobre os materiais que empregamos, a pegada de carbono que xeran, e a súa reciclaxe.

Esta ferramenta permítenos coñecer a pegada de carbono asociada a cada un dos espectáculos que produciremos no futuro, e a forma de reducila se aproveitamos ben o que temos e controlamos ao máximo o que precisamos mercar. O sistema permite tamén xerar informes a partir de filtros relacionados coa medida, o peso, os materiais ou o ciclo de vida de cada recurso, de forma que as e os profesionais da dirección de arte poidan ter en conta con que recursos contan, e de que características, para aproveitar os materiais cos que xa contamos nos nosos almacéns.

A futuro, a intención de Ainé é introducir na ecuación ao resto do sector, de forma que sexa posible iniciar un camiño de colaboración con outras produtoras e compañías para compartir recurso e facer máis longa a vida útil dos recursos materiais que empregamos constantemente no noso traballo.