Estreamos ‘Territorio Regueifa’, un espectáculo para celebrar a tradición oral galega
Dirixido por José L. Prieto, estrearase no FIOT, en Carballo, o venres 3 de outubro, mesturando música, humor, improvisación e narración para poñer en valor unha das manifestacións máis singulares da tradición oral.
Cartel de 'Territorio Regueifa'. Deseño: Noa Fernández
Ainé estreará o próximo 3 de outubro ‘Territorio Regueifa’, un espectáculo de teatro, humor, música e improvisación, no que dous regueifeiros e unha regueifeira introdúcennos na arte da regueifa, as súas orixes , a súa evolución, e a súa vixencia na actualidade.
O espectáculo combinará a didáctica coa recreación de distintas escenas teatrais, como a primeira regueifa da historia, a incorporación da muller no mundo da improvisación rimada, ou como sería un telexornal feito en verso, e tamén o público participará de forma activa recibindo unha clase de iniciación á improvisación oral cantada, que rematará cunha gran festa musical final.
Dirixido e escrito por José L. Prieto, con máis de trinta e cinco anos de traxectoria profesional no teatro galego, o espectáculo conta con Lupe Blanco, Josinho da Teixeira e Manolo Maseda no elenco.
O FIOT e o Centro Dramático Galego participan como coproductores no proxecto. As primeiras funcións terán lugar o 3 de outubro ás 21:00 e o 4 de outubro ás 20:00 no Pazo da Cultura en Carballo, no marco do festival organizado pola Asociación Cultural Telón e Aparte, que acollerá tamén outras actividades paralelas relacionadas coa regueifa, como unha mesa redonda organizada polo Consello da Cultura Galega, o próximo mércores 25, ou a participación do equipo do espectáculo no formato Onda Fiot o sábado 4.
NOTICIAS RELACIONADAS
Lamatumbá, finalista nos XIII Premios Martín Códax da Música
A banda ourensá opta ao galardón na categoría de Orquestras, Grupos e Música de Verbena, reafirmando o seu lugar como un dos grandes referentes da festa e da música popular galega.
‘Amoriños’ chega a Cee e Vigo con cheos absolutos e suma novas funcións en Pontevedra e A Coruña
A xira de ‘Amoriños’, continúa esta fin de semana en Cee e Vigo, con case todas as entradas esgotadas. O espectáculo amplía ademais o seu percorrido con novas datas en Pontevedra e unha quinta función no peche da Coruña.
Xosé A. Touriñán súmase a ‘Chisteria Colectiva’, unha das grandes apostas do EMHU 2026
O humorista participa no espectáculo colectivo xunto a outros grandes nomes da comedia estatal, unha estrea absoluta no marco do encontro que xa colgou o cartel de entradas esgotadas para as súas dúas funcións en Palexco.