‘Cuñados’ preestréase en Ourense e prepara a súa chegada aos cines

O filme, producido por Portocabo, e que protagoniza Xosé A. Touriñán xunto con Federico Pérez e Miguel de Lira, chegará ás pantallas este venres.

O Teatro Principal de Ourense acolleu este domingo a preestrea de Cuñados, a primeira longametraxe da produtora Portocabo, coa dirección de Toño López. O acto, ao que asistiron, ademais das actrices e actores, representantes da Deputación de Ourense, a CRTVG, a Consellería de Cultura e a Axencia Galega das Industrias Culturais, e a Denominación de Orixen Ribeiro, adiante o comezo do percorrido do filme polas salas de todo o país, previsto para este próximo venres.

Protagonizada por Xosé A. Touriñán, Federico Pérez e Miguel de Lira, Cuñados é unha das estreas máis agardadas da temporada, tanto polo reparto -que completan María Vázquez, Iolanda Muiños e Eva Fernández-, como por supor a chegada de Portocabo á ficción para a gran pantalla, logo de colleitar innumerables éxitos na televisión e as principais plataformas, como Hierro ou Augaseca.

Rodada o pasado verán na comarca do Ribeiro (Ourense), contou co equipo de Ainé Producións para as tarefas de produción -con Javi Lopa como xefe de produción-. O filme é tamén a primeira experiencia na gran pantalla, con tan só dez anos, da actriz Antía Touriñán.

Actrices, actores e autoridades posaron no photocall momentos antes da preestrea. Foto: O Sil

Os actos previos á chegada do filme ás salas terán continuidade ao longo da semana, con outras dúas preestreas, prevista en Madrid e A Coruña.

Unha comedia criminal

Cuñados é unha comedia sobre as peripecias delitivas de tres cuñados unidos polo azar e embarcados nun plan disparatado para salvar o que máis queren: a familia.

Eduardo e o seu cuñado Sabonis acaban de meter a pata nun dos seus negocios e precisan cartos. Moitos cartos. Será Sabonis quen lle atope a solución ao problema secuestrando a Modesto, cuñado de Alicia Zamora, a empresaria que os enganou e os deixou tirados. Só hai un pequeno problema: Alicia non pensa pagar un peso polo seu cuñado. Mais é o propio Modesto quen urde un novo plan co que Eduardo e Sabonis poderán salvar a adega familiar. Eduardo, Sabonis e Modesto téñeno todo para fracasar pero, como diría Sabonis, malo será.

Artigo anterior
‘Fariña’ seguirá en Madrid ao menos ata o 9 de maio
Artigo seguinte
‘Fariña’ representarase no Teatro Tívoli de Barcelona entre o 18 ao 23 de maio

NOTICIAS RELACIONADAS

Portada » Caderno » ‘Cuñados’ preestréase en Ourense e prepara a súa chegada aos cines