¡Cumprimos un ano!

Resumimos o primeiro ano de Ainé: centos de quilómetros por media Galicia, moita xente marabillosa, moitos proxectos interesantes e un equipo inmellorable. Grazas por compartir este ano con nós!

Rematou o primeiro ano de vida de Ainé. Un 1 de xaneiro de 2015 pasaba á historia das nosas vidas como o día no que comezaba unha aventura que non podía apetecernos máis. A nosa intención era facer cousas relacionadas coa cultura, e aínda que a vantaxe de camiñar ao carón de Touri, Marcos, Fede e Pepo era toda unha garantía, esforzámonos desde o principio por non depender de ninguén, por buscar debaixo das pedras o traballo que nos permitiría prolongar esta viaxe durante moito tempo. E cremos que non o fixemos mal de todo!

Viaxamos moito, e percorremos Galicia acompañando aos nosos monologuistas en cada actuación. Viaxamos con Manolo Lojo, pero tamén con Touri. Coas Cantareiras de Ardebullo, con Curtis e Teixeiro, con Pepo, con Fede, con Isi… Estivemos con Víctor Grande, con Pablo Meixe, con Pedro Brandariz… Canto talento!

Participamos na produción dun monólogo teatralizado para R co que visitamos localidades como Allariz, O Barco, Ponteceso ou As Pontes. Botamos unha man aos nosos amigos de Etiqueta Negra en Amigos ata a morte. Enchémonos de monte e natureza nos Sendeiros Pedagóxicos de Castelo Deporte, unha asociación coa que tamén colaboramos noutros proxectos como un punto de valoración do estado físico na carreira pola ría do Burgo ou a propia Travesía do Xalo en Culleredo.

Na segunda metade do ano tocou televisión e tocou produción de eventos: puxemos o noso grao de area para que Buscando Ardebullo, un programa que en pouco tempo verá a luz na Televisión de Galicia fora, ou iso cremos, todo un éxito. Organizamos varias presentacións dos novos modelos de Mercedes Benz en Galicia, e tamén de Volvo. Encargámonos de moitas cousas nun evento para Ence en Pontevedra coa xente de quattro idcp, e organizamos a festa dos 50 anos de Cafés Siboney e a presentación da Joyería Jael na Coruña.

Mandamos a Javi a Almería para traballar na produción de Dhogs, puxemos bonito o Soho da Coruña para a presentación de LaMagall e para unha festa ambientada no Gran Gatsby, montamos todo un campo de fútbol cheo de actividades de lecer no torneo do Depor en Abegondo…

Fixemos estas e tantas outras cousas en movemento, e cando parabamos, traballabamos na oficina desde Betanzos ata xuño e en Matogrande desde xullo. Que lonxe queda xa a que durante a primeira metade do ano foi a nosa casa, e canto botamos de menos á xente do Dimi!

Aínda que na Coruña recibíronnos da mellor das formas: fixémonos amigos de toda a xente de CSC e do Soho, con quen compartimos agora partidas de padel, cafés e ata algunha copa.

E fixemos todo isto grazas a moita xente, pero sobre todo grazas a Touri, Marcos, Fede, Pepo, Manolo e Javi. E fomos moitos os que ao longo do ano formamos parte desta historia: Alicia, Juan Torrado, Miguel, Héctor, Laura, Jorge, Adri, Cris, Sofía, Javi e Álvaro, pero tamén todos e cada un dos que en cada proxecto e para centos de cousas quixestes botarnos unha man e formar parte do noso equipo.

Se as cousas en 2016 non van todo o ben que deberan non será por ganas nin por ilusión. Seguimos remando!

Feliz 2016.