‘Carbón’ chega en marzo aos teatros galegos

Xurxo Mariño e Oswaldo Digón estrean en Galicia este espectáculo que mestura a charla de divulgación científica coa comedia. As primeiras funcións terán lugar na Illa de Arousa e Santiago de Compostela.

Carbón chega a Galicia este mes de marzo. O espectáculo foi estreado no evento Naukas Bilbao nun Palacio Euskalduna completamente cheo. Agora Xurxo Mariño e Oswaldo Digón estarán nos teatros e auditorios galegos con este show que mestura a divulgación científica co humor.

A primeira función en Galicia terá lugar no Auditorio da Illa de Arousa o venres 4 de marzo. As entradas están á venda no Bar O Museo e na Administración de Loterías San Xulián. Ao día seguinte, Carbón viaxa a Santiago de Compostela, o Auditorio Abanca acollerá unha representación cuxas entradas están xa dispoñibles en Ataquilla.

Ciencia e humor en combustión

Resulta que, nun anaco de carbón, hai atrapados raios do Sol, radiación que foi absorbida por algunha planta fai nada menos que 300 millóns de anos. Os seres humanos descubrimos non só como se produciu todo isto, senón tamén a maneira de liberar esa luz solar.

Carbón é, en palabras dos seus creadores, unha charla de divulgación científica lixeiramente teatralizada e combinada con monólogos de humor. O neurocientífico e divulgador Xurxo Mariño e o actor e humorista Oswaldo Digón embárcanse nunha viaxe apaixonante partindo dun humilde anaco de carbón con dúas premisas básicas: Mostrar a capacidade poética da ciencia e descubrir esa poesía en calquera obxecto cotián.

A partir desta pedra de cabón, Xurxo e Oswaldo van fiando historias fascinantes e diversas. Nelas explícanse desde a estrutura química da madeira, o grafito e o diamante ara o proceso da combustión e a súa relación coas nosas mitocondrias. Todo isto cun ton poético e moito humor, apoiados en imaxes e efectos sonoros.