Cancelación de ‘Territorio Regueifa’ no FIOT34
O Festival Internacional Outono de Teatro e Ainé Producións comunican que a estrea de 'Territorio Regueifa', prevista para os días 3 e 4 de outubro no Pazo da Cultura de Carballo, queda cancelada debido á baixa médica dun dos actores. Para non deixar ao público sen teatro, o venres 3 de outubro presentarase un espectáculo alternativo: o monólogo 'Aquí tou!', de Xosé A. Touriñán.
Aquí Tou! é o espectáculo en solitario de Xosé A. Touriñán. Foto: Aigi Boga
A estrea absoluta de Territorio Regueifa ía abrir o Programa de Sala do FIOT34, pero unha baixa médica imprevista dun dos tres membros do elenco impide a representación. A condición de protagonistas de todo o reparto e a singularidade artística dos regueifeiros fan que a substitución non sexa viable, especialmente a apenas tres días da función.
O FIOT mantén o seu compromiso coa obra e reprogramará a estrea cando a compañía poida retomar o traballo coas condicións humanas e técnicas necesarias. A nova data da estrea será informada proximamente.
Mentres, para que o teatro non cese en Carballo neste outubro, o festival programou Aquí tou!, un monólogo de Xosé A. Touriñán, que terá lugar o venres 3 de outubro, ás 21:00 horas, no Auditorio do Pazo da Cultura.
- Abonados: poderán asistir co seu abono sen facer xestións adicionais. Quen non queira acudir poderá solicitar a devolución proporcional ata media hora antes do inicio da función, en Ataquilla.com ou na billeteira do teatro.
- Público xeral: as entradas estarán dispoñibles proximamente en Ataquilla.com e na billeteira do Pazo da Cultura, desde 90 minutos antes do inicio da función, segundo dispoñibilidade.
Tamén quedan canceladas a función escolar prevista para o venres 3 de outubro ás 11:00 e a sesión de Onda FIOT – Escola do Espectador nas Ondas, prevista para o sábado 4 ás 12:30h.
Dende o Festival Internacional Outono de Teatro e Ainé Producións desexamos ao noso compañeiro unha pronta recuperación e agradecemos ao público a súa comprensión e apoio.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.