A estrea de ‘Fariña’ na Coruña será accesible para persoas con discapacidade auditiva
A adaptación teatral da obra de Nacho Carretero poderá seguirse os días 25 e 26 de outubro a través de equipos de frecuencia modulada, unha axuda técnica proporcionada pola asociación ACOPROS.
A adaptación teatral de ‘Fariña’ aposta pola accesibilidade. Pola posibilidade de chegar a todo o público, neste caso, ás persoas con discapacidade auditiva. Faino a través da colaboración coa asociación coruñesa ACOPROS, que traballa para dar resposta ás necesidades das familias con fillas e fillos con discapacidade auditiva, así como para o resto de persoas interesadas na realidade das persoas xordas.
A achega de equipos de frecuencia modulada -unha axuda técnica específica que permite aos espectadores xordos poder seguir a obra-, permitirá a persoas con discapacidade auditiva gozar das primeiras funcións de ‘Fariña’, o espectáculo teatral protagonizado por Xosé A. Touriñán, Marcos Pereiro, María Vázquez, Cris Iglesias e Sergio Zearreta, baseado na obra de Nacho Carretero.
O Teatro Colón da Coruña acollerá os días 25 e 26 de outubro os primeiros pases do que está chamado a ser un dos grandes éxitos da temporada teatral en Galicia, un espectáculo que logo do seu paso pola Coruña visitará todas as grandes cidades galegas nunha xira que se prolongará ata o mes de febreiro.
ACOPROS defende desde hai máis de corenta anos os intereses globais das persoas con discapacidade auditiva e as súas familias diante da sociedade e as administracións, sensibilizando sobre a sordera e promovendo o diagnóstico precoz e a atención temperá.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.