Logo de encher en todas e cada una das funcións programas o pasado mes de outubro, a obra de Javier Veiga visitará de novo os teatros das grandes cidades galegas. As entradas para algúns dos pases desta segunda xira están xa á venda en Ataquilla.

touriamigos
Foto: Marcos Martínez

Confirmado como un dos grandes éxitos do teatro en galego deste 2015 que remata, Amigos ata a morte, a comedia de Javier Veiga interpretada por Xosé A. Touriñán, David Amor e Ledicia Sola, volve aos teatros de media Galicia en marzo. O sensacional éxito das funcións deste outono en Noia, Pontevedra, Vigo, Compostela, A Coruña, Ourense e Ferrol tivo como consecuencia que moitos espectadores interesados na obra quedaran sen entrada, polo que actores, director e produtora non o dubidaron á hora de programas novas datas.

En Ataquilla pódense mercar xa billetes para as funcións de Pontevedra (11 de marzo), Vigo (12 de marzo), Ourense (18 de marzo) e A Coruña (19 de marzo), aínda que nas próximos días se coñeceran outras datas e localidades nas que será posible gozar cun texto que, antes de ser interpretado en galego, xa triunfara en centos de representacións polo resto de España.