Xosé A. Touriñán interpretará a Manuel Fraga en ‘La Canción’, a nova serie de Movistar+
Creada por Pepe Coira e Fran Araujo, estrearase o 8 de maio, e conta historia detrás da vitoria de Massiel en Eurovisión no ano 1968.
'La Canción' está protagonizada por Patrick Criado, Alex Brendemühl, Carolina Yuste e Marcel Borràs.
Xosé A. Touriñán volve á ficción esta primavera como parte do reparto de La Canción, unha miniserie de tres episodios sobre o histórico triunfo de Massiel en Eurovisión.
Esteban Guerra -Patrick Criado-, un inexperto executivo de Radio Televisión Española, recibe a orde de asegurar a victoria de España en Eurovisión. Con pouca experiencia no mundo musical, pero decidido a cumprir coas expectativas dos seus superiores, lidera a “Operación Eurovisión”. Así, recruta a Artur Kaps -Àlex Brendemühl-, un experto en espectáculos televisivos, con quen emprende a busca da canción e o intérprete ideais que proxecten unha imaxe moderna de España ao resto de Europa. No proceso superan múltiples obstáculos, como unha polémica con Joan Manuel Serrat -Marcel Borràs-, que inicialmente fora seleccionado como representante español. Finalmente, a responsabilidade é de Massiel -Carolina Yuste-, quen logra unha histórica vitoria co coñecido “La, La, La”.
Como parte do contexto social e político da época aparecen na serie diferentes figuras, entre elas a de Manuel Fraga, interpretada por Xosé A. Touriñán. A serie combina drama, comedia e nostalxia, para lembrar un momento decisivo do tardofranquismo. Os galegos Pepe Coira e Fran Araújo están detrás do guión e a idea orixinal de La Canción, que Movistar+ estreará o 8 de maio.
Novos proxectos de Touriñán fóra de Galicia
La Canción será o primeiro proxecto audiovisual de ficción no que participará Touriñán este ano. Tamén estará na segunda temporada de Clanes, cuxa rodaxe foi anunciada esta pasada semana por Netflix, ou a longametraxe Rondallas, dirixida por Daniel Sánchez Arévalo.
NOTICIAS RELACIONADAS
‘Amoriños’ chega ao Noroeste Estrella Galicia cunha edición especial en Santa Margarida
O espectáculo de Xosé A. Touriñán e David Perdomo formará parte da programación da 39 edición do Festival Noroeste Estrella Galicia cunha función especial o 9 de agosto.
Xosé A. Touriñán incorpórase ao elenco da terceira e última tempada de ‘Clanes’
A serie de Netflix producida por Vaca Films despídese cunha última entrega que volve reunir a Clara Lago e Tamar Novas como protagonistas, xunto a un amplo elenco do que forma parte Xosé A. Touriñán. A tempada final pecha a historia deste universo do narcotráfico en Cambados.
Máis improvisación oral para despois do verán: ‘Territorio Regueifa’ suma tres novas funcións
O espectáculo regresará aos escenarios en outubro e novembro con tres novas funcións xa confirmadas. Entre elas destaca a primeira representación fóra de Galicia, que terá lugar en Barakaldo.