Touriñán enche por dúas ocasións en As Pontes co Monólogo do Imbécil
O actor e humorista cullerdense interpreta nesta obra de José Luis Prieto a Santi, a quen todo lle sae mal. O espectáculo, producido pola compañía emedous, visitará outras cinco localidades galegas ata o próximo mes de xaneiro.
O tirón dos espectáculos de Xosé A. Touriñán segue a ser incuestionable. O Concello de As Pontes tivo onte que xestionar unha función adicional do Monólogo do Imbécil polas longas ringleiras de persoas que se formaron para conseguir entradas para o espectáculo teatral, que se representou este martes no Cine Alovi. Ás poucas horas colgábase o cartel de ‘entradas esgotadas’ tamén para a segunda función.
O acontecido en As Pontes ven a consolidar o incontestable éxito que están a ter os espectáculos nos que Touriñán participa: tamén con Curtis e Teixeiro (xunto con Federico Pérez) e con Manolo Lojo (o seu monólogo en solitario) foi quen de encher nas funcións programadas nas últimas semanas.
Co Monólogo do Imbécil, Touriñán visitará Boiro, A Coruña, Vimianzo, Vigo e Vilagarcía ata que, a finais do próximo mes de xaneiro, peche a xira que o ten levado por máis de dez localidades do país.
As próximas oportunidades para gozar co humor de Touriñán en directo serán, non obstante, co espectáculo Curtis e Teixeiro, que representará este venres en Vimianzo, o sábado en Compostela, o venres 11 de novembro en Vilagarcía de Arousa, e o sábado 12 en Burela. Toda a información sobre puntos de venda pódese consultar na web www.curtiseteixeiro.gal
NOTICIAS RELACIONADAS
‘Amoriños’ chega ao Noroeste Estrella Galicia cunha edición especial en Santa Margarida
O espectáculo de Xosé A. Touriñán e David Perdomo formará parte da programación da 39 edición do Festival Noroeste Estrella Galicia cunha función especial o 9 de agosto.
Xosé A. Touriñán incorpórase ao elenco da terceira e última tempada de ‘Clanes’
A serie de Netflix producida por Vaca Films despídese cunha última entrega que volve reunir a Clara Lago e Tamar Novas como protagonistas, xunto a un amplo elenco do que forma parte Xosé A. Touriñán. A tempada final pecha a historia deste universo do narcotráfico en Cambados.
Máis improvisación oral para despois do verán: ‘Territorio Regueifa’ suma tres novas funcións
O espectáculo regresará aos escenarios en outubro e novembro con tres novas funcións xa confirmadas. Entre elas destaca a primeira representación fóra de Galicia, que terá lugar en Barakaldo.