Logo dunha fin de semana para repoñer forzas despois de reunir a 4500 persoas na Coruña, Xosé A. Touriñán e David Perdomo volven o venres aos escenarios na quinta cita da xira de Corentena · Game Over, no Auditorio Carmen Estévez de Vilalba, para a que quedan pouco máis de cincuenta entradas. Será o retorno dos cómicos á vila luguesa logo das representacións da primeira parte do espectáculo, en xaneiro do pasado ano.
O sábado será a quenda de Vigo. O Teatro Afundación acollerá dous pases, ás 19.00 e ás 21.30 horas, para os que tamén quedan as últimas localidades a través de www.corentena.gal. Preto de 2000 espectadoras e espectadores desfrutarán do espectáculo no antigo García Barbón.
Novas citas en maio e xuño
O Grove e Lugo serán as últimas oportunidades para ver o espectáculo antes do verán: o 2 de maio e o 6 de xuño, respectivamente, no auditorio da localidade pontevedresa e o no Gustavo Freire. Con estas dúas datas Touriñán e Perdomo pecharán o seu primeiro percorrido por Galicia con Corentena · Game Over reunindo a preto de 15.000 espectadoras e espectadores.
Sobre Corentena · Game Over
As exitosas conversas dos humoristas coruñeses durante a pandemia deron lugar a ‘Corentena’, unha proposta escénica que entre 2023 e 2024 foi quen de situarse entre os espectáculos máis exitosos da temporada en Galicia. Agora volven cun inédito videoxogo teatral no que o público desfruta con personaxes coñecidos e outros que tardará en esquecer. A participación das e dos espectadores é unha das grandes novidades deste proxecto producido por Ainé.
