O mes de xuño pecha as primeiras xiras de ‘Somos Criminais’, ‘Coleccionistas’ e ‘A culpa é do sistema’
Tres dos espectáculos que marcaron a axenda cultural desta primavera en Galicia rematan na primeira quincena deste mes os seus respectivos percorridos polo país, pensando xa en novas datas para os meses do outono.
A conta atrás para o verán está en marcha. Tempo de festas ao aire libre, no que a programación teatral colle aire para preparar a temporada do outono, e no que os actores aproveitan para unha merecida pausa antes de retornar aos escenarios.
Tres dos espectáculos máis valorados desta primavera despídense temporalmente do público durante a primeira quincena deste mes de xuño. E con eles, os actores encargados de conquistar ao público: ás case 30.000 persoas que, entre todos eles, reuniron nos teatros durante estes últimos meses.
‘Somos Criminais’ é sinónimo de records. Trinta e tres funcións entre marzo e maio, e sete máis programadas para o mes de xuño. Todas elas coas entradas esgotadas desde hai tempo. Ponteareas, A Rúa (8 e 9 de xuño respectivamente), Burela e Narón (15 e 17 de xuño), serán as últimas localidades que Xosé A. Touriñán e Carlos Blanco visitarán nesta primeira xira. Anuncian, iso si, máis datas para o outono, repetindo en moitos dos lugares nos que colgaron o cartel de “entradas esgotadas” na primeira volta.
‘Coleccionistas’, o espectáculo de Marcos Pereiro, Oswaldo Digón e Santi Romay, con Cristian Leggiero na ambientación musical, rematarán a xira o 9 e 0 10 de xuño. Será no Carballiño e en Vigo, respectivamente, logo de visitar outras nove localidades nos últimos meses, sorprendendo ao público cunha impecable posta en escea a través de divetidas improvisacións interpretando obras de arte.
Pepo Suevos e Federico Pérez rematarán a xira o 16 de xuño, nunha última función no Carballiño. Nestes meses estiveron en Ponteareas, Ortigueira, Negreira, Cee, A Coruña, Cambados e A Illa de Arousa. ‘A culpa é do sistema’ é o nome dun espectáculo que xa fixo rir a centos de persoas, e co que ninguén quedou indiferente.
Todas as datas e os enlaces coa venda de entradas de todos os espectáculos está dispoñible na axenda da web de Ainé Producións.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.