Nucha e Mucha apúntanse a Verbenalia
O programa presentado por Rodrigo Vázquez contará este venres con Xosé A. Touriñán como pregoeiro, e coa actuación das Cantareiras de Ardebullo como convidadas especiais. Panorama, Os Resentidos e Los Satélites amenizarán unha festa na que tamén estarán Os Tres Trebóns e Radio Cos. Toda unha referencia do mundo da verbena, Sito Sedes, será o artista convidado.
Que é unha festa sen humor? Unha reflexión deste tipo fixo nalgún momento o equipo de Verbenalia para preparar o programa que a Televisión de Galicia emite este venres (22.00 horas), no que será o terceiro programa dos sete previstos para o que queda de verán.
Un cartel de luxo, o que ten preparado o programa conducido por Rodrigo Vázquez, para esta semana, co actor e humorista cullerdense Xosé A. Touriñán como pregoeiro.
O contraste de estilos marcará o apartado musical, coas orquestras Los Satélites (no plató) e Panorama (no orquestródromo). Ao palco desta última subirán Os Tristes, o dúo formado por Federico Pérez e Marcos Pereiro, para dirixirse á multitude congregada diante do escenario.
Sen embargo, o Verbenalia deste venres non só terá orquestras… Os Resentidos, a banda capitaneada polo polifacético Antón Reixa, Os Tres Trebóns, e Radio Cos, montarán a festa nun plató que vibrará ao longo de tres intensas horas de programa.
Mucha e Nucha, as coñecidas Cantareiras de Ardebullo, achegarán o humor ao cartel da festa, e contra o final do programa, xa na zona disco, haberá sorpresas coas Fillas da Conexa e os propios Tristes como protagonistas.
En definitiva, un programa para non perder, o deste venres, que contará coa comisión de festas habitual, formada por Patri Santana, Eva Iglesias e Manuel de Andrade.
NOTICIAS RELACIONADAS
Touriñán celebra o día dos namorados cunha función do seu monólogo en Madrid
Este sábado, Xosé A. Touriñán regresa ao Teatro Arlequín de Madrid cunha nova función do seu monólogo, dentro dunha xira estatal que percorrerá distintas cidades máis alá das nosas fronteiras.
Monólogo de Xosé A. Touriñán
Un monólogo que viaxará por todo o Estado, no que Xosé A. Touriñán mestura humor e experiencia vital para conectar co público desde a proximidade.
‘Territorio Regueifa’ presentouse onte en Carballo como un soño que chega ao escenario
A estrea absoluta de ‘Territorio Regueifa’, este venres 6 de febreiro no Pazo da Cultura de Carballo, foi presentada nunha rolda de prensa que puxo o foco na importancia de levar a regueifa ao teatro e de reivindicala como arte viva.