Estreamos ‘Entre Táboas’, a nosa revista mensual por correo electrónico

Máis de seis mil seguidores do traballo que facemos en Ainé teñen desde esta semana un novo lugar de encontro cos nosos espectáculos e artistas. ‘Entre Táboas’ lanza hoxe o seu primeiro número, con contidos de interese pensados polo equipo da revista Táboas, que editamos desde hai dous anos.

A primeira edición deste boletín mensual, previsto para o último venres de cada mes, recolle unha entrevista en profundidade do xornalista Borja Casal a Xosé A. Touriñán e David Perdomo, onde repasan o éxito de Corentena, o seu último espectáculo, e falan da experiencia coa que durante a pandemia xuntaban cada noite a máis de 20.000 espectadores a través de Instagram.

‘Entre Táboas’ repasa tamén a biografía de Vadim Yukhnevich, na entrevista en vídeo ‘Un lugués do leste’. Un paseo polo centro de Lugo da man de Marta Otero Mayán, coa realización de Jairo Iglesias e as fotografías de Aigi Boga.

Tamén estrea unha crónica de Amara Fontao sobre a última edición do Castelo Conta, o festival que cada mes de agosto enche a pequena parroquia de Culleredo de actividade cultural ao redor da tradición oral, o rural e a comedia.

Recomendacións e actualidade

Cada número da revista contará tamén cun apartado no que o equipo de Táboas recompilará cuestións de actualidade sobre a actividade escénica en Galicia, e ofrecerá algunhas recomendacións para o seguinte mes.

No pé das páxinas tanto de Ainé como de Táboas é posible subscribirse ao boletín para recibilo de forma mensual.