Detrás do Castelo Conta: a produción dun festival único

Unha parroquia, seis localizacións, sete días, 38 eventos programados e máis de 10.000 persoas desfrutando da comedia, a cultura rural e a tradición oral

Xosé A. Touriñán no Día Grande do Castelo Conta. Foto: Aigi Boga

En todas as festas chega o momento do sorteo —do que sexa que anuncian as rifas— e de facer “que suba a Comisión”. Aquí non imos rifar nada pero si explicamos o traballo que fixo posible que desfrutaramos o Castelo Conta na súa VII edición, que se celebrou entre o 22 e o 28 de agosto.

Levar programación cultural ao rural é o obxectivo principal dun festival que xurdiu dun espectáculo de monólogos organizado polo actor culleredés para axudar á comisión a pagar o que quedara a deber das anteriores festas. Deste xeito, o Castelo Conta bota a andar, sendo un evento cultural sen ánimo de lucro que carecería de sentido ningún de se desvincular do lugar. Ao mesmo tempo contribúe a coidar do noso; a dinamizar a vida no rural, a promover as artes escénicas, gardar a tradición oral e conservar o patrimonio natural. Nesta edición avanzouse na eliminación de barreiras a persoas con diversidade funcional ao contar con intérpretes de lingua de signos nos dous grandes espectáculos do festival —Somos Criminais 3 e a noite dos monólogos—, en colaboración da Federación de Asociacións de Persoas Xordas de Galicia.

Programación para todo tipo de público

Sés actuando no novo escenario da Leira de Himerio. Foto: Aigi Boga

Ao Castelo Conta acudiron máis de 10.000 persoas para desfrutar dunha moi variada programación, que incluiu seis espectáculos teatrais e dezaseis concertos, comezando ás 10 da mañá e estendéndose a meirande parte dos días ata ben entrada a madrugada. Mais todas as actividades estiveron marcadas polo humor e a música, por exemplo, a andaina na que ao longo de catro horas camiñando actuaron unha charanga, un grupo de música tradicional, Carlos Blanco e Luis Davila e ata houbou unha barra móbil.

Ademais, todas as mañás de luns a venres tiña lugar o campamento para nenos de entre 5 e 12 anos Xente Miúda e, ás tardes, os coloquios Contos de Castelo conducidos por Tone Martínez, nos que a xente maior tomaba o protagonismo e explicaba como eran os seus tempos. Tamén houbo espazo para as artes gráficas. No marco da homenaxe a Finita Gay, inaugurouse un mural no que o artista urbano galego Mon Devane retratou á icónica cantante de orquestras.

Por suposto, tampouco faltou de comer nin de beber. Nas localizacións onde se desenvolvía a programación sempre había unha barra, ás mañás os miúdos e as miúdas almorzaban con Deleite, celebrouse unha churrascada popular o venres, o sábado máis de 1.200 persoas xantaron e cearon no día grande de Castelo e houbo sesión vermú con Nordesía o domingo.

Público chegando a Castelo. Foto: Paula Correa

Todo isto e máis desenvolveuse en cinco localizacións, algunhas públicas, coma o Campo da Capela e a Polideportiva, e outras privadas que a veciñanza poñía ao dispor do festival, coma o Alpendre do Ferrador ou a Leira de Himerio. Ademais, tamén se instalou decoración con información por toda a parroquia e balados publicitarios en Cullerdo, Cambre, A Coruña, Carballo e Arteixo.

En todo momento ao longo do festival houbo persoal traballando no material gráfico —imaxe e vídeo—, de xeito que esta produción diaria se traduciu nunha comunicación intensa e seguida ao longo da semana. Porén, a comunicación comezou moito antes, o 29 de xullo, e continuou un par de semanas despois de rematado o festival. Ademais da web do Castelo Conta tamén se empregaron as canles propias que ten o festival en Instagram, Facebook e Twitter. O crecemento nestas foi notable e evidencia o efectivo do traballo de comunicación: o Instagram aumentou en case 1.000 seguidores e tivo máis de 500.000 impresións das publicacións, o Facebook medou tamén en case 1.000 seguidores con máis de 500.000 impresións e o Twitter tivo uns 100 seguidores máis e preto de 2.000 interaccións.

Ademais da veciñanza de Castelo, o Castelo Conta foi posible grazas ao apoio do Concello de Culleredo, a Deputación da Coruña, a Xunta de Galicia a través da Agadic e o Xacobeo 21·22, e ao patrocinio de Deleite, Estrella Galicia, Méndez-Rojo Familia Bodeguera, Nordesía, Ron Burla Negra e 25 Lolita’s.

Revive o Castelo Conta!

Artigo anterior
‘Somos Criminais 3’ en Castelo
Artigo seguinte
Presentamos ‘Recortes, caneos e outras formas de driblar’

NOTICIAS RELACIONADAS

Portada » Caderno » Detrás do Castelo Conta: a produción dun festival único