A praia tardará un tempo en abrir
‘Unha noite na praia’ apraza a xira prevista para os meses de maio, xuño e xullo, logo de coñecer as medidas para a volta á normalidade, que impedirán por un tempo os aforos completos nos teatros.
O espectáculo protagonizado por Xosé A. Touriñán e Carlos Blanco non xirará por Galicia nestes meses. As limitacións de aforo propostas dentro das medidas para a volta á normalidade logo da crise da COVID-19 non fan posible as funcións previstas, moitas delas con todas as entradas xa vendidas e polo tanto, cos teatros cheos.
Os espectadores que xa tiveran as súas entradas mercadas poderán optar por quedar con elas para as novas datas, aínda por confirmar, ou solicitar a devolución dos importes -en www.unhanoitenapraia.gal pódese consultar o procedemento-.
As incertezas sobre as medidas de limitación de aforos para os próximos meses fan que polo momento non se anuncien novas datas: a xira programarase de novo unha vez sexa posible ver cheos os teatros e auditorios de Galicia. En calquera caso, a través da web e as redes sociais de Ainé Producións, así como a través das redes sociais dos artistas, comunicaranse todas as novidades.
NOTICIAS RELACIONADAS
‘Amoriños’ amplía a súa segunda xira con novas datas e funcións
O espectáculo de Xosé A. Touriñán e David Perdomo suma novas paradas na súa xira de primavera, incluíndo no percorrido a Vilagarcía, Santiago, Ourense, Cee e Narón.
Xosé A. Touriñán inicia este venres o percorrido estatal do seu monólogo
O cómico actúa esta semana no Teatro Arlequín Gran Vía, primeira parada dunha serie de funcións que o levarán tamén por Bilbao, Barcelona e Oviedo nos próximos meses.
‘Amoriños’ prepárase para unha primavera de amor sobre as táboas
Tras unha primeira xira con funcións esgotadas, Touriñán e Perdomo regresarán no mes de marzo coa súa última proposta, un espectáculo de citas tolas, improvisación e moito corazón.