“Máis audiovisual, máis traballo e máis igualdade”
A gala de entrega dos XV Premios Mestre Mateo trasladou a reivindicación de todo o sector da necesidade de que as profesionais do audiovisual teñan máis oportunidades. Os traballos finalistas dos que participou Ainé Producións non foron finalmente premiados.

Iolanda Muiños encargouse de avanzar ao inicio da gala dos XV Premios Mestre Mateo algúns dos temas que marcarían as dúas horas e media da gran festa do audiovisual galego: traballo e igualdade. Dous eixos sobre os que xiraron non só as intervencións da presentadora ou do presidente da Academia no seu discurso, senón tamén os discursos de boa parte dos gañadores.
Reivindicacións compartidas por todo un sector disposto a amosarlle á sociedade do que é capaz de facer. Para iso reclamouse o apoio das institucións e as empresas. A Academia Galega do Audiovisual ofreceuse, para estes obxectivos e tamén para o da igualdade real entre homes e mulleres, como interlocutor.
Ás portas dos premios
As producións finalistas relacionadas con Ainé Producións non tiveron demasiada sorte no que a premios se refire. Na categoría de mellor anuncio publicitario o Mestre Mateo foi para Cando chega o inverno, da axencia 300 Kilos. Serramoura impúxose a Nós, de Osdous Ardebullo, na categoría de mellor serie, e Land Rober Tunai Show fixo o propio con Buscando Ardebullo na categoría de mellor programa. Federico Pérez tampouco gañou o premio á mellor interpretación masculina protagonista, e a realización de Verbenalia tampouco resultou premiada.
Foron premiados en cambio algúns profesionais que ao longo do pasado ano traballaron en producións como Nós (Jaime Pérez, director de fotografía, levou o Mestre Mateo á mellor dirección de fotografía por Esquece Monelos), ou Verbenalia (Suso Montero, director de arte de Verbenalia, Buscando Ardebullo e O Son das Letras gañou o premio á mellor dirección de arte por Dalia, a modista). O premio á mellor webserie foi para Galicia Crime, un proxecto no que participou Pepo Suevos.
NOTICIAS RELACIONADAS
‘Territorio Regueifa’ continúa o percorrido fóra de Galicia con dúas funcións en Asturias
O espectáculo chegará a Xixón e Vegadeo os días 27 e 28 de novembro, respectivamente, nunha nova parada da xira que está levando a improvisación oral galega a outros territorios.
Unha nova etapa para ‘Territorio Regueifa’
O espectáculo de Lupe Blanco, Manolo Maseda e Josinho da Teixeira ofrecerá tres funcións durante esta fin de semana en Barakaldo e Laudio. Será a primeira vez que a proposta saia de Galicia desde a súa estrea en febreiro.
Zaragoza, a próxima parada do humor de Touriñán
O humorista actuará este sábado no Teatro de las Esquinas, nun percorrido que o levará de novo a Madrid en novembro. A xira continuará en 2027 con novas funcións en Madrid, Valencia, Santander e León.


