Touriñán leva ‘Aquí Tou!’ ao Carballiño, Lugo e Ponteareas esta fin de semana
Serán as últimas datas da xira do seu espectáculo en solitario nesta primavera, que esgotou as entradas en todas as funcións, mesmo con máis dun pase en cada localidade.
Aquí Tou! é o espectáculo en solitario de Xosé A. Touriñán. Foto: Aigi Boga
Xosé A. Touriñán pecha esta fin de semana a xira coa que percorreu distintas localidades galegas durante toda a primavera. Aquí Tou!, un dos monólogos máis exitosos da última década en Galicia por número de espectadores, estará no Carballiño (venres 23, 21.00 e 23.00), Lugo (sábado 24, 21.00) e Ponteareas (domingo 25, 18.30 e 21.00), coas entradas practicamente esgotadas (só quedan algunhas para a segunda función do Carballiño e para a de Lugo; pódense mercar en www.aquitou.gal).
Coas representacións desta fin de semana Touriñán completa a viaxe que nos últimos meses levou o seu espectáculo en solitario a Redondela, Melide, Sanxenxo, Cee ou Ourense, entre outras localidades, e co que foi quen de esgotar as localidades para todos os pases.
Sobre Aquí Tou!
Touriñán fai un repaso pola súa vida en Aquí Tou!, mesturando ficción e realidade, anécdotas ou cultura popular para explicar como chegou a ser quen é hoxe. O espectáculo conta na produción con Laura Canto, Miguel Vázquez, Pablo Goirigolzarri e Laura Sixto, e na iluminación e o son con Gonzalo Porteiro.
NOTICIAS RELACIONADAS
Xosé A. Touriñán recibe o Premio de Honra Manuel Lourenzo de Feteagal
O recoñecemento foi entregado o pasado sábado no Teatro Colón da Coruña, durante a gala dos I Premios Feteagal Manuel Lourenzo do Teatro Amador Galego.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
O concerto de Bibopalula
As cancións da serie musical en galego Bibopalula chegarán ao escenario da man de Isabel Garrido (voz), que interpretará os temas da súa banda sonora xunto a Luis Lago (piano), Graciela Carlos (batería) e Pedro Placer (guitarra), nun espectáculo pensado para gozar en familia.