‘Unha noite na praia’ traslada as funcións no Teatro Colón da Coruña aos días 3, 4 e 5 de xullo, e as do Teatro Afundación de Vigo aos días 10 e 11 de xullo. A función de Narón terá lugar o 9 de xullo. Os espectadores poderán manter as súas entradas para as novas datas ou solicitar a devolución dos importes.

‘Unha noite na praia’ apraza as súas funcións na Coruña e Vigo atendendo ás medidas de contención do COVID-19 decretadas pola Xunta de Galicia e o goberno do Estado.

    A Coruña

Os días 3, 4 e 5 de xullo terán lugar no Teatro Colón da Coruña as funcións do espectáculo protagonizado por Carlos Blanco e Xosé A. Touriñán, e escrito e dirixido por Javier Veiga. Todos os espectadores con entradas para esta fin de semana poderán decidir entre manter as súas localidades ou solicitar a devolución dos importes.

As entradas para as funcións dos días 13, 14 e 15 de marzo serán válidas para as funcións dos días 3, 4 e 5 de xullo, respectivamente, tanto no caso das localidades mercadas a través da plataforma Ataquilla como da plataforma Eventbrite. Para a devolución dos importes será preciso enviar un correo electrónico a ataquilla@afundacion.org (compras realizadas en Ataquilla.com) e imce@gestiontickets.online (compras realizadas en Eventbrite).

A través de www.unhanoitenapraia.gal é posible mercar novas entradas para as funcións de xullo, ao quedar liberadas as localidades dos espectadores que non poderán asistir.

    Vigo

Os días 10 e 11 de xullo terán lugar no Teatro Afundación de Vigo as funcións previstas ata o momento para os días 17 e 18 de abril. Os espectadores que xa tiveran mercada a súa entrada poden mantela para as datas de xullo sen realizar ningún tipo de trámite. Aqueles interesados en recuperar os cartos poden solicitalo no enderezo electrónico ataquilla@afundacion.org

    Narón

A función prevista no Pazo da Cultura de Narón queda aprazada para o 9 de xullo. Aquelas persoas que teñan mercada a súa entrada poderán acceder sen facer ningún tipo de cambio, e quen desexe a devolución dos importes poderá solicitalo no teléfono 981 102 897.

    Resto da xira

En relación ao resto de funcións previstas na xira do espectáculo -a partir do 15 de maio-, agardaranse indicacións da Xunta de Galicia ou dos diferentes concellos para o anuncio de novos aprazamentos.