A noite de Reis, no último capítulo de Nós
O humor de carácter didáctico, centrado nas tradicións relacionadas co Nadal no noso país, ocupou parte da programación da TVG durante estas festas co novo programa de Touriñán e Marcos Pereiro. O terceiro episodio, centrado na festa de Reis, emítese este xoves ás 22.00 horas.
Remata o Nadal con algunhas dúbidas resoltas sobre a orixe da árbore, a lotería, o discurso do Rei… Todo grazas a Nós, o novo programa de Touriñán e Marcos Pereiro que a Televisión de Galicia emitiu durante estas festas, e ao que lle queda un último episodio.
A cita será esta noite, ás 22.00 horas, na canle pública, desta volta cun episodio centrado na festa de Reis e as súas características: a relación entre o Apalpador, os Magos de Oriente e Papá Noel, a razón pola que se tiran caramelos nas cabalgatas, ou a tradición dos agasallos serán algúns dos temas sobre os que Lois Pastoriza (Xosé A. Touriñán) ilustrará aos espectadores, presentando divertidas recreacións en diferentes momentos da historia do noso país.
E é que ata agora con Nós coñecemos xa a prehistoria e os construtores de megalitos, a romanización, os Séculos Escuros ou mesmo nos situamos no lugar dos emigrantes na Idade Moderna. Foi nos especiais de Noiteboa e Noitevella, nos que o programa, producido por Osdous Ardebullo, acadou moi bos datos de audiencia.
Pepo Suevos e Federico Pérez completan o reparto desta serie de especiais, dirixidos polos propios Touriñán e Pereiro e por Carlos Ares, Andrés Mahía e Xosé Castro, e nos que o equipo de Ainé se encargou da produción.
NOTICIAS RELACIONADAS
‘A Lacena Pequena’ chega a Triacastela cunha programación arredor do patrimonio e a natureza
A programación inclúe unha exposición de Ana Carballo, unha conferencia do antropólogo Rafael Quintía, unha degustación de produtos locais e actuacións de danza e música tradicional.
‘Territorio Regueifa’ chega hoxe ao Val do Ubra cunha función de balde
O Auditorio Municipal acolle ás 20.30 h unha nova representación do espectáculo, protagonizado por Lupe Blanco, Manolo Maseda e Josinho da Teixeira. A xira continuará en novembro con dúas citas en Barakaldo e Ames.
A Lacena Pequena chega á Rúa cunha xornada arredor da memoria, as festas e o viño
A programación do 3 de outubro percorrerá a historia das celebracións da localidade, a tradición vitivinícola de Valdeorras e a música popular. A xornada contará con conversas, poesía, unha cata de viños e cantos de taberna.