Improvisación, arte e solidariedade xúntanse en ‘Coleccionistas’
Cada función do novo espectáculo de Marcos Pereiro, Oswaldo Digón e Santi Romay remata cunha poxa real de réplicas de obras de arte na que participan todos os espectadores. Os beneficios recadados son destinados á Cruz Vermella.
As poxas xa están en marcha. Comezaron este sábado, na Illa de Arousa. Cun cheo absoluto recibiron na localidade pontevedresa a Marcos Pereiro, Oswaldo Digón e Santi Romay, acompañados do músico Cristian Leggiero. Foi a primeira das once previstas nos próximos dous meses, nas que improvisación, arte, pero tamén solidariedade, mestúranse nun orixinal espectáculo.
E é que a da solidariedade é unha das particularidades máis sorprendentes para o público, convidado a participar nunha poxa real de réplicas de coñecidas obras de arte, achegando as súas ofertas para non marchar para a casa coas mans baleiras.
O importe recadado en cada unha das funcións, que sempre dependerá da xenerosidade do público, ten un destinatario: é a Cruz Vermella, que ao remate da xira percibirá todo o xuntado nestas curiosas poxas.
En www.coleccionistas.gal pódense consultar todas as datas da xira, que rematará en Vigo o próximo 10 de xuño logo de percorrer, ademais da Illa de Arousa, as localidades de Negreira, Ribadeo, Cee, A Coruña, Ponteareas, Melide, Verín, Lugo e O Carballiño.
NOTICIAS RELACIONADAS
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.
Chega ‘A Lacena Pequena’, un novo proxecto cultural itinerante
Ainé e E-ló Arquitectura poñen en marcha unha proposta que combina música, artes escénicas, gastronomía e patrimonio a través dunha singular infraestrutura.