Zaragoza, a próxima parada do humor de Touriñán
Despois de pasar este ano por diferentes cidades do Estado, Xosé A. Touriñán continúa a súa xira fóra de Galicia. Zaragoza será a penúltima parada do percorrido en 2026, antes dunha nova función en Madrid o vindeiro mes de novembro.
Touriñán durante unha función en Madrid. Fotografía: María Simón
A xira estatal de Xosé A. Touriñán continúa en Zaragoza, cidade que acollerá o monólogo do humorista o vindeiro sábado 31 de outubro ás 20.00 h no Teatro de las Esquinas. A cita será unha das últimas oportunidades deste ano para velo fóra de Galicia, antes de regresar a Madrid o próximo mes de novembro.
Tras pasar por cidades como Madrid, Barcelona, Oviedo e Bilbao, Touriñán mantén o seu percorrido por diferentes escenarios do Estado cun espectáculo que combina humor, retranca e historias recoñecibles para o público. A seguinte función terá lugar o 13 de novembro no Teatro Arlequín de Madrid, ás 22.45 h, unha nova parada nunha cidade que xa forma parte habitual da súa xira.
O calendario continuará en 2027 con novas datas confirmadas. O 22 de xaneiro, o humorista regresará ao Teatro Arlequín de Madrid, cunha función ás 22.30 h, e ao día seguinte, o 23 de xaneiro, actuará no Teatre Talia de Valencia, ás 23.00 h. Máis adiante, o monólogo chegará a Santander o 27 de febreiro, cunha función ás 19.30 h no Teatro CASYC, e a León o 24 de abril, ás 20.30 h no Auditorio Ciudad de León.
Sobre o escenario, Touriñán constrúe un espectáculo baseado na proximidade, na palabra e na experiencia compartida co público. A través da mestura de realidade e ficción, revisita momentos da súa propia biografía, decisións, erros, referencias culturais e situacións cotiás que, desde o humor e a retranca, conectan coa memoria de todos e todas.
As entradas para as próximas funcións do monólogo están dispoñibles a través da web do humorista, touri.gal, onde se pode consultar tamén o calendario actualizado da xira.
NOTICIAS RELACIONADAS
A xira de ‘Moi Animal’ continúa colgando o cartel de esgotado
A nova proposta de Xosé A. Touriñán estará este venres 30 de outubro no Auditorio Municipal de Ourense, con dous pases, ás 20.30 e ás 23.00 h. A resposta do público continúa acompañando a xira, que xa ten varias funcións completas nas próximas semanas.
‘A Lacena Pequena’ remata en Boqueixón o seu primeiro percorrido
O proxecto cultural itinerante pechará esta fin de semana a súa primeira ruta, despois de pasar por cinco concellos. A última parada será este sábado 31 de outubro en Lestedo, cunha xornada que combinará gastronomía, patrimonio, música e cultura popular.
Touriñán chega hoxe a Vilalba con ‘Moi Animal’
O Auditorio Municipal Carmen Estévez acollerá dúas funcións do novo monólogo do humorista, que aborda en clave de comedia a nosa relación cos animais e as contradicións da especie humana.