‘Aquí Tou!’ regresa ás táboas cunha función especial da man de Touriñán
O pase terá lugar o 26 de setembro no Porriño e busca apoiar á Rondalla que participou na película Rondallas, aproveitando a oportunidade para reencontrarse co público cun espectáculo que xa se converteu nun clásico do repertorio do humorista.
Xosé A. Touriñán durante unha función de 'Aquí Tou!'. Fotografía: Aigi Boga
Hai tempo que Aquí Tou! deixou de ser unha proposta máis no repertorio de Xosé A. Touriñán para converterse nun clásico. Hai case catro anos que o humorista puxo sobre o escenario unha mirada especialmente persoal sobre a súa propia vida, as súas experiencias e todo aquilo que o foi acompañando ao longo dos anos, sempre en clave de humor.
No monólogo, Touriñán afástase dos personaxes para falar en primeira persoa e percorrer lembranzas, situacións familiares, relacións e pequenas contradicións do día a día. Unha proposta construída desde a experiencia propia, pero na que tamén hai espazo para que o público recoñeza situacións, recordos e formas de ver a vida que lle resultan próximas.
Esta vez, a función terá lugar no Pavillón Municipal de Deportes do Porriño e estará vinculada a unha realidade que tamén chegou á gran pantalla. Con este pase, preténdese apoiar á Rondalla que participou na rodaxe de Rondallas, establecendo así un vínculo entre o espectáculo e unha agrupación da vila que forma parte da película.
A iniciativa permite reunir nunha mesma noite dúas facetas presentes na traxectoria de Touriñán, o humor e o cinema, ao tempo que contribúe a apoiar o traballo dunha Rondalla que levou parte da identidade do Porriño a unha produción cinematográfica.
Case catro anos despois da súa estrea, Aquí Tou! volve, así, aos escenarios para compartir outra noite co público e facelo, nesta ocasión, cunha finalidade especial.
As entradas están dispoñibles a través de ataquilla.com
NOTICIAS RELACIONADAS
Vedra, Boqueixón, A Rúa, Portas e Triacastela, as cinco paradas do primeiro percorrido de ‘A Lacena Pequena’
A primeira parada do proxecto será en Ponte Ulla, onde a Lacena desenvolverá unha programación cultural durante os días 18 e 19 de setembro. A iniciativa continuará posteriormente por concellos de menos de 5.000 habitantes.
‘A Lacena Pequena’ comeza en Vedra a súa primeira viaxe
O proxecto itinerante impulsado por Ainé e E-ló Arquitectura levará programación cultural a pequenos núcleos de poboación e dará a coñecer mañá en Ponte Ulla as cinco paradas do seu primeiro percorrido.
‘Moi Animal’, o novo monólogo de Touriñán, suma novas funcións á súa primeira xira
O novo monólogo de Xosé A. Touriñán esgota localidades en Cee e Santiago e amplía funcións na Coruña, Vilagarcía, Vigo e Pontevedra. A xira, que comezará en outubro, continúa medrando antes da súa chegada aos escenarios galegos.