O Teatro Alcázar, en pleno centro da capital, acollerá desde a próxima semana a adaptación teatral da obra de Nacho Carretero de mércores a domingo, logo do sensacional éxito do pasado mes de setembro nas Naves del Español.
O espectáculo representouse durante tres semanas nas Naves del Español, no medio de todas as incertezas pola situación sanitaria na capital. Convértese nun dos éxitos máis relevantes da historia do teatro galego fóra do noso país.
O espectáculo volve a Galicia logo de esgotar as localidades cada día en Madrid durante un mes. Será xusto na semana na que se cumprirá un ano da estrea no teatro coruñés. As entradas sairán á venda nos próximos días.
Logo das primeiras funcións, as diferentes críticas nos medios de comunicación da capital confirman o éxito da adaptación teatral da obra de Nacho Carretero, dirixida por Tito Asorey coa dramaturxia de José L. Prieto.
Algunhas das caras máis coñecidas do xornalismo e a cultura, en moitos casos galegos na capital, acompañaron a Nacho Carretero e o equipo de Fariña o pasado xoves na estrea nas Naves del Español. Á función asistiron tamén a Ministra de Traballo e Economía Social e a Delegada da Área de Goberno de Cultura, Turismo e Deportes do Ayuntamiento de Madrid.
As Naves del Español acollerán do 17 de setembro ao 11 de outubro o espectáculo dirixido por Tito Asorey, que leva ás táboas a exitosa obra de Nacho Carretero. Os teatros públicos madrileños retomarán coa produción galega a súa programación logo da crise sanitaria.
