Touriñán e Pereiro, nunha función na Coruña o pasado mes de xuño | Foto: Carla García

Para os que seguen a Touriñán e a Marcos Pereiro desde as súas primeiras aparicións televisivas, no Supermartes, cando aínda eran as Cantareiras de Verdillo, ou xa no Luar, resulta non só entretido, tamén emocionante. Agora en serio, un espectáculo exclusivo que entre o dramaturgo Manolo Cortés, o actor e director Evaristo Calvo e os propios protagonistas prepararon para celebrar os quince anos xuntos dos actores cullerdenses, volve aos escenarios coas últimas datas dunha xira que comezaba en Noia no mes de maio, e que contou por milleiros os espectadores ás funcións que na primavera tiveron lugar nas grandes cidades galegas.

Burela, Ourense, Vimianzo, Ponteareas e outras dúas localidades aínda por anunciar completarán o cartel da derradeira volta deste repaso sobre o escenario ao que durante estes quince anos fixeron Touriñán e Pereiro, co común denominador da comedia e o bo humor.

Burela será a primeira parada desta xira de outono, o 22 de setembro. Para esta primeira cita as entradas venderanse desde este venres en Ataquilla, a Biblioteca Municipal e o bar O Traste.

Ao día seguinte Agora en serio estará no Teatro Principal de Ourense, coas entradas á venda en Ataquilla, e unha función prevista para as 21.00 horas.

O 30 de setembro Touriñán e Pereiro achegaranse a Vimianzo, para actuar na Casa da Cultura tamén ás 21.00 horas, e xa o 8 de outubro a cita será en Ponteareas, no Auditorio Reveriano Soutullo, ás 20.00 horas.

Está previsto o anuncio de dúas datas máis antes para antes do 14 de outubro, o día no que os actores celebrarán unha festa que pretenden abrir a todo o seu público en Culleredo, e da que proximamente se coñecerán máis detalles.